Skenari i zi parashikon që një grup terrorist i afrohet një aeroporti për të goditur një avion në ulje apo në ngritje, apo në lartësi që arrihen lehtësisht prej “Strela”-s. Histori e vjetër dhe e re. Herën e parë që e kanë menduar ishin vitet ’70. Jo në Bagdad, por në Fiumicino, në Romë. Atëherë i ndalën. Por nuk është e thënë që do ia dalin gjithmonë
Shërbimi i fshehtë amerikan ka rritur fluturimet e avionëve të zbulimit mbi Irak. Dhjetëra misione në ditë, disa prej të cilëve i janë besuar avionëve pa pilot, por të armatosur. Spiunojnë militantët e ISIS, ndërkohë që bërthama të vogla forcash speciale, të ndihmuar nga informatorë vendas, kryejnë investigime me një mision të vecantë. Të zbulojnë nëse ekstremistët kanë arritur të zotërojnë raketa në gjendje të godasin avionët e pasagjerëve në lartësi të mëdha.
Alarmi – sipas asaj që ka zbuluar London Times – lidhet me rrugët që ndjekin kompanitë e rëndësishme ajrore perëndimore që, në udhëtimet e tyre, kalojnë mbi rajonin e Mosulit, kryeqyteti i kalifatit të shpallur nga ISIS. British Airways BA106, që fluturon nga Dubai në Londër, përshkon këtë zonë. E njëjta gjë vlen për BA2042 që niset nga Maldivet dhe shkon drejt kryeqytetit britanik. Tani shërbimet e fshehtë perëndimorë duan të kuptojnë nëse edhe në këtë skakierë mund të verifikohet një situatë e ngjashme me atë të Boeingut malajzian, që u shkatërrua nga një Sa11 në qiejt e Ukrainës.
Në këta muajt e fundit, muxhahedinët e ISIS-it që vepron mes Sirisë dhe Irakut, kanë pushtuar shumë baza ushtarake duke zotëruar tashmë materiale luftarakë shumë të rëndësishëm. Dhe kanë shtënë në duar tanke, raketa dhe sisteme kundërajrorë të lëvizshëm të tipit Sam7B. Por ndoshta luftëtarët kanë arritur t’u marrin kundërshtarëve të tyre edhe ata lloje aparatësh që janë në gjendje të komandojnë një raketë nga toka, përmes një radari, kundër një avioni pasagjerësh. Ky është edhe shkaku i daljes së urdhërit për njësitë speciale në terren, që të grumbullojnë sa më shumë informacione. Zakonisht, militantët ngarkojnë në internet pamje filmike ku shfaqin “prenë” e tyre dhe shpesh herë kanë dokumentuar shkatërrimin e avionëve gjuajtës sirianë, me anë të raketëhedhësve të lëvizshme. Por tani mund të kenë edhe ndonjë surprizë, duke fshehur një raketëhedhës si “Buk” që është përdorur edhe prej rebelëve prorusë në Ukrainë.
Megjithatë, disa ekspertë thonë se nuk ka gjasa që ISIS dëshiron ta rrisë sfidën. Të paktën në këtë fazë, Kalifi Ibrahim do të ishte më i interesuar të konsolidonte pozicionin e lëvizjes në rajon. Por të tjerë nuk e përjashtojnë mundësinë që mund të provojë një goditje spektakolare për t’u konsakruar përfundimisht si armiku numër një, duke vënë në shënjestër avionin civil ndërkombëtar.
Shqetësimi i ngritur nga London Times i bashkohet risisë së shpallur nga Abu al Baraa, një ish oficer sirian që kaloi në anën e rezistencës në vitin 2012. Rebeli ka zbuluar se ia ka dalë të krijojë bateri të rikarikueshme për sistemet e lëvizshëm Sam 7B, në përdorim të shumë grupeve të opozitës. Po ta dëgjosh, “udhëzimet” janë të thjeshtë. Ashtu si edhe përbërësit e nevojshëm: tre bateri litiumi të shkëputura nga një kompjuter i vjetër, disa kondensues të marrë nga një frigorifer, pjesë elektrike të një radioje dhe disa kabllo që i gjen edhe në shtëpi. Kostoja totale: 50 dollarë. Një shpenzim i papërfillshëm që mund të shkaktojë dëme të mëdhenj. Po, sepse “receta” e Abu Al Baraa i cili ka ndjekur edhe një kurs në Katar, mund të riaktivizojë raketa të rrezikshme për avionët, nëse zihen në befasi në një lartësi 4 mijë metra. Një studim amerikan ka përllogaritur që nga viti 1975, 40 avionë me qindra pasagjerë në bord janë rrëzuar me raketa. Jo shumë e ndërlikuar, e lehtë të fshihet, e gjetshme në një treg të zi të ushqyer prej grabitjes së shumë arsenaleve arabë. Libia e Gedafit – sa për të krijuar një ide – kishte blerë 20 mijë “Strela”. Pas vrasjes së Gedafit, humbën 2 mijë të tilla. Një sasi e madhe, që shkaktoi rënien e cmimeve.
Në vitin 2011, për ta blerë duheshin 10 mijë dollarë, sot kushton sa gjysma. Por jo gjithmonë funksionojnë. Bateritë termike të nevojshme për lëshimin zgjasin shumë pak, kanë një skadencë, dhe duhet të ruhen mirë. Kishin raketat, por jo ushqimin e nevojshëm. Al Baraa e zgjidhi problemin duke ndërtuar bateri që zgjasin më shumë dhe mund të rikarikohen.
Edhe këtu, skenari i zi parashikon që një grup terrorist i afrohet një aeroporti për të goditur një avion në ulje apo në ngritje, apo në lartësi që arrihen lehtësisht prej “Strela”-s. Histori e vjetër dhe e re. Herën e parë që e kanë menduar ishin vitet ’70. Jo në Bagdad, por në Fiumicino, në Romë. Atëherë i ndalën. Por nuk është e thënë që do ia dalin gjithmonë. /Guido Olimpio/corriere.it/
BOTA.AL
