Home»Nunc est Bibendum»Prosecco dhe buzëqeshjet britanike! Lufta e vogël e flluskave!

Prosecco dhe buzëqeshjet britanike! Lufta e vogël e flluskave!

 

Për flluska e perlage nuk kemi folur deri tani në Nunc est Bibendum. Por një shkrim i The Guardian dhe kundërpërgjigjet thummbuese e të legjitimuara të italianes Corriere della Sera e meritojnë një vend në Nunc est Bibendum!

Rreth një muaj më parë, The Guardian” shkruante se vera e gazuar italiane, “Prosecco” dëmton dhëmbët e anglezëve. Pohonte po ashtu, nisur nga përvoja personale e autores së shkrimit, se pasojat e një dehjeje me Prosecco janë edhe më të këqija sesa ato të një dehjeje me birrë. Prosecco është një verë e gazuar italiane e zonës verilindore e përftuar nga rrushi Glera, të paktën në rastet e emërtimeve të origjinës së kontrolluar si Prosecco, Conegliano-Valdobbiadene e Asolo. Metoda e përdorur është ajo Charmat, pra me autoclave dhe në më të shumtën e rasteve, me hedhje në shishe shumë të shpejtë.

Por siç, objektivisht vëren Il Corriere della Sera, pse pikërisht Prosecco dhe jo Champagne franceze apo vetë vera e gazuar angleze, të shkatojë dëmtime të zmaltit, vrima në dhëmbë, dhe zhvendosje të gengivave, shkrimi nuk e rrëfen. Që sheqernat dhe acidet – e gjendura në shumë verëra – dëmtojnë potencialisht dhëmbët e buzeqeshjen, kjo na është thënë që në fillore kur kujdeseshin qe të ishim të rregullt në higjenën e dhëmbëve dhe dhëmballëve. Tek e fundit, as vetë varieteti i rrushit e as proçesi i vinifikimit të Prosecco-s nuk mbartin ndonjë veçori, përsa i përket nivelit të rrezikut të sipërpërmendur. Kështu që diçka tjetër fshihet pas këtij shënjestrimi të flluskave italiane.

Britania e Madhe është kthyer së fundmi në tregun e parë për nga numrat, të verës së gazuar italiane. Plot 366 milionë euro vetëm në vitin 2016, që do të thotë një rritje me 33% krahasuar me vitin paraardhës. Britanikët rrëkëllejnë 40 milionë litra çdo vit. Afërmendsh, gjatë fazës së realizimit të plotë të Brexit-it, Britania do të bëjë çmos të kufizojë exportin dhe të rrisë konsumin e verës së gazuar angleze, e cila është tashmë realitet i konsoliduar në jugun e Gadishullit Britanik.

Sipas Corriere della Sera, disa muaj më parë, Ish-Kryetari i Bashkisë së Londrës Boris Johnson i kishte shpjeguar Ministrit italian të Zhvillimit Ekonomik, Carlo Calenda: “Nëse nuk na e mundësoni lirinë e qarkullimit të mallrave, do të bllokojmë Prosecco-n”. Dhe Calenda e kishte paralajmëruar po ashtu: «Dhe ne do të bllokojmë fish and chips (të famshmet peshk dhe patate të skuqura, tipike britanike). Shkrimi i The Guardian ka vënë bashkë për herë të parë, guvernatorë të poleve të kundërta politike në reagimin ndaj lajmit. Legisti Luca Zaia i rajonit Veneto dhe Friuli Venezia Giulia, e quajti atë menjëherë të rremë, ndërsa Debora Serracchiani e PD-së bëri shaka më këtë lajm: “Mendoj se pas Brexit, Britania e Madhe ka nevojë të ndihmojë qytetarët që t’u kthehet buzëqeshja: e marrë në doza të moderuara,  Prosecco jonë bën mrekulli. Me një tweet, edhe Ministri i Politikave Agrare, Ushqimore dhe Pylltarisë, Maurizio Martina i është drejtuar burimit britanik: “I dashur Guardian, thuaj të vërtetën: Prosecco ia del t’i bëjë edhe anglezët të buzëqeshin! Ndalini këto lajme të rreme, faleminderit”.

Prosecco është prej kohësh një verë, që përveçse fort e preferuar nga britanikët, pasuron zgjedhjen e cilitdo të apasionuar të flluskave, duke sjellë në gotë mençurinë, traditën, shijet dhe aromat e rajonit prej të cilit vjen, e prandaj çdo kritikë e pabazë, tendencioze e për më tepër e ngritur varfërisht“, nuk shihet aspak me sy të mirë nga Nunc Est bibendum!

 

Komentoni

Nuk ka komente

Vendos komentin tend

Your email address will not be published. Required fields are marked *