Home»Bota»Koreja e Veriut kërcënon SHBA: Hakmarrja jonë, shumë më e madhe

Koreja e Veriut kërcënon SHBA: Hakmarrja jonë, shumë më e madhe

“Hakmarrja jonë do të jetë 1.000 herë më e madhe”. Ky ka qenë reagimi i Koresë së Veriut ndaj atij që e quan “komplot i urryer i Shteteve të Bashkuara për të izoluar Penianin”.

Në një komunikatë për shtyp, shteti komunist thekson se masat e Kombeve të Bashkuara nuk do ta detyrojnë vendin të bëjë lëshime mbi programin e tij bërthamor.

Më herët, një zyrtar i Seulit njoftoi se Peniani e kishte cilësuar si të pasinqertë ofertën për bisedime nga fqinji jugor, në një takim të rrallë të nivelit të lartë.

Tensionet janë përshkallëzuar ndjeshëm në gadishullin korean gjatë muajve të fundit, mes testeve të vazhdueshme bërthamore. Këshilli i Sigurimit votoi të shtunën për vendosjen e sanksioneve të reja ndaj Penianit.

Muajin e kaluar, Seuli propozoi mbajtjen e bisedimeve me Veriun për të zbutur tensionet dhe mundësuar ribashkimin e familjeve të ndara nga lufta koreane, por deri më tani Peniani nuk ka dhënë një përgjigje zyrtare.

Media koreano-jugore raportoi se dy ministrat e Jashtëm shtrënguan duart në një takim të shkurtër gjatë një darke zyrtare të organizuar nga Shoqata e Shteteve të Azisë Juglindore. Një zyrtar i Ministrisë së Jashtme koreano-jugore, që konfirmoi takimin për BBC, tha se refuzimi i ofertës për bisedime nga homologu i tij lidhej me sanksionet në rritje ndaj shtetit komunist.

Nuk ka komente

Vendos komentin tend

Your email address will not be published. Required fields are marked *